Út eru komnar leiðbeiningar fyrir starfsmenn fyrirtækja um samkeppnisreglur útgefnar af Viðskiptaráði Íslands, Lögmannafélagi Íslands og Samtökum atvinnulífsins. Leiðbeiningarnar bera heitið Hollráð um heilbrigða samkeppni en í þeim er að finna aðgengilega og vel skiljanlega útlistun á reglum samkeppnislaga, hvað beri að varast þegar kemur að samkeppni á markaði og hvaða forvarnir fyrirtæki geti ráðist í til að komast hjá samkeppnislagabrotum. Í leiðbeiningunum er fjallað um samninga, samskipti og samstarf fyrirtækja, misnotkun á markaðsráðandi stöðu, samruna og tilkynningar til Samkeppniseftirlitsins vegna þeirra og samkeppnisréttaráætlanir fyrirtækja.
LOCAL lögmenn hafa um árabil veitt viðskiptavinum sínum, fyrirtækjum jafnt sem einstaklingum, ráðgjöf á sviði samkeppnisréttar. Í tilefni af útgáfu leiðbeininganna hvetja LOCAL lögmenn til þess að fyrirtæki hugi að samkeppnismálum, hvort sem um er að ræða möguleg brot á samkeppnislögum eða forvörnum sem fela t.a.m. í sér gerð samkeppnisréttaráætlunar. Sérfræðingar LOCAL lögmanna á sviði samkeppnisréttar munu áfram vera til taks í þeim efnum.